ಟಿಕ್‌ಟಾಕ್‌ ಮೂಲಕ ಸಿಕ್ಕಾಪಟ್ಟೆ ಫೇಮಸ್ ಆಗಿದ್ದ ಸೋನು ಶ್ರೀನಿವಾಸ್ ಗೌಡ ಈಗ ನೇರವಾಗಿ ಸ್ಯಾಂಡಲ್‌ವುಡ್‌ಗೆ ಕಾಲಿಟ್ಟಿದ್ದಾರೆ. ಅವರ ಮೊದಲ ಚಿತ್ರದ ಕುರಿತು ಸಾಕಷ್ಟು ಮಾಹಿತಿಗಳನ್ನೂ ಹಂಚಿಕೊಂಡಿದ್ದಾರೆ. ಆ ಬಗ್ಗೆ ಇಲ್ಲಿದೆ ಲೇಖನ.ಟಿಕ್‌ಟಾಕ್ ಆ್ಯಪ್ ಬ್ಯಾನ್‌ ಆಗೋಕು ಮೊದಲು ಅದೆಷ್ಟೋ ಜನರು ಸೋಶಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ಫೇಮಸ್ ಆಗಿದ್ದರು. 15 ಸೆಕೆಂಡ್‌ಗಳ ಅವಧಿಯಲ್ಲೇ ತಮ್ಮ ಪ್ರತಿಭೆ ತೋರಿಸಿ, ಲಕ್ಷ-ಲಕ್ಷ ಫಾಲೋವರ್‌ಗಳನ್ನು ಸೃಷ್ಟಿಸಿಕೊಂಡಿದ್ದರು. ಸದ್ಯ ಕೇಂದ್ರ ಸರ್ಕಾರ ಆ ಆ್ಯಪ್‌ನ ಬ್ಯಾನ್ ಮಾಡಿದೆ.

ಇದೀಗ ಅದೇ ಮಾದರಿಯ ಆ್ಯಪ್‌ಗಳು ಬಂದಿವೆ. ಅಂದಹಾಗೆ, ಈ ಟಿಕ್‌ಟಾಕ್ ಮೂಲಕ ಸಿಕ್ಕಾಪಟ್ಟೆ ಫೇಮಸ್ ಆದವರಲ್ಲಿ ಸೋನು ಶ್ರೀನಿವಾಸ್ ಗೌಡ ಕೂಡ ಒಬ್ಬರು. ಇಷ್ಟು ದಿನ ಸೋಶಿಯಲ್‌ ಮೀಡಿಯಾದಲ್ಲಿ ಟಿಕ್‌ಟಾಕ್ ಮೂಲಕ ಸೌಂಡು ಮಾಡಿದ್ದ ಅವರೀಗ ನೇರ ಸ್ಯಾಂಡಲ್‌ವುಡ್‌ಗೆ ಕಾಲಿಟ್ಟಿದ್ದಾರೆ. ಮೊದಲ ಸಿನಿಮಾದ ಅನುಭವವನ್ನೂ ಹಂಚಿಕೊಂಡಿದ್ದಾರೆ.

ಧರ್ಮ ಕೀರ್ತಿರಾಜ್ ಸಿನಿಮಾದಲ್ಲಿ ಸಿಕ್ತು ಚಾನ್ಸ್
‘ನಾನೀಗ ‘ಕ್ಯಾಡ್ಬರೀಸ್’ ಸಿನಿಮಾದಲ್ಲಿ ನಟಿಸುತ್ತಿದ್ದೇನೆ. ಇದು ಧರ್ಮ ಕೀರ್ತಿರಾಜ್ ಅವರು ಹೀರೋ ಆಗಿರುವ ಸಿನಿಮಾ. ಅದ್ವಿತಿ ಶೆಟ್ಟಿ ನಾಯಕಿ. ನನಗೆ ಇದರಲ್ಲಿ ಒಂದು ತುಂಬ ಮಹತ್ವದ ಪಾತ್ರ ಇದೆ. ಅದು ಯಾವ ಥರದ ಪಾತ್ರ ಅಂತ ನಾನು ಈಗಲೇ ಹೇಳಲು ಸಾಧ್ಯವಿಲ್ಲ. ನನ್ನ ಟಿಕ್‌ಟಾಕ್‌ ವಿಡಿಯೋಗಳು ಸಿಕ್ಕಾಪಟ್ಟೆ ವೈರಲ್ ಆಗಿದ್ದವು. ಅದನ್ನು ನೋಡಿ, ನನಗೆ ಈ ಸಿನಿಮಾದಲ್ಲಿ ಅವಕಾಶ ನೀಡಿದ್ದಾರೆ. ನಾನು ಯಾವುದೇ ಆಡಿಷನ್ ನೀಡಿಲ್ಲ. ನೇರವಾಗಿ ಆಯ್ಕೆಯಾದೆ. ಸಿನಿಮಾದಲ್ಲಿ ನಟಿಸುವುದು ಸುಲಭದ ಮಾತ್ರವಲ್ಲ. ಟಿಕ್‌ಟಾಕ್‌ ಮಾಡಿದಷ್ಟು ಸುಲಭ ಇಲ್ಲಿರುವುದಿಲ್ಲ’ ಅಂತ ಶೂಟಿಂಗ್ ಅನುಭವಗಳನ್ನು ಹಂಚಿಕೊಳ್ಳುತ್ತಾರೆ ಅವರು.

sonu-srinivas-gowda

ಕ್ಯಾಮೆರಾ ಮುಂದೆ ನಟಿಸುವುದು ದೊಡ್ಡ ಸವಾಲು
‘ಟಿಕ್‌ಟಾಕ್‌ ಮಾಡುತ್ತಿದ್ದರಿಂದ, ಸಿನಿಮಾದಲ್ಲೂ ನಟಿಸುವುದು ಸುಲಭ ಅಂದುಕೊಂಡಿದ್ದೆ. ಈ ಸಿನಿಮಾದ ನಟನೆಗಾಗಿ ತುಂಬ ರಿಹರ್ಸಲ್ ಮಾಡಿದ್ದೇನೆ. ಟಿಕ್‌ಟಾಕ್‌ಗಾಗಿ 15 ಸೆಕೆಂಡ್ ವಿಡಿಯೋ ಮಾಡುವುದು ಯಾವ ದೊಡ್ಡ ಸಾಧನೆಯೂ ಅಲ್ಲ! ಸೆಟ್‌ನಲ್ಲಿ ಸಾಕಷ್ಟು ಜನರ ಎದುರು, ದೊಡ್ಡ ಕ್ಯಾಮೆರಾ ಮುಂದೆ ನಟಿಸುವುದು ಇದೆಯಲ್ಲ, ಅದು ದೊಡ್ಡ ಸವಾಲಿನ ಕೆಲಸ. ಆರಂಭದಲ್ಲಿ ನನಗೆ ಏನೂ ಗೊತ್ತಾಗುತ್ತಿರಲಿಲ್ಲ. ದಿನ ಕಳೆದಂತೆ ಸಿನಿಮಾದ ಒಂದೊಂದೇ ವಿಚಾರಗಳನ್ನು ಕಲಿತುಕೊಳ್ಳುತ್ತ ಹೋದೆ. ಧರ್ಮ ಅವರ ಜೊತೆ ಶೂಟಿಂಗ್ ಮಾಡಿದ್ದು ಖುಷಿ ನೀಡಿತು’ ಎಂದು ಹೇಳಿಕೊಳ್ಳುತ್ತಾರೆ ಸೋನು.

ವೆಬ್ ಸಿರೀಸ್‌ನಲ್ಲೂ ನಟನೆ
‘ನಾನೊಂದು ವೆಬ್ ಸಿರೀಸ್ ಮಾಡುತ್ತಿದ್ದೇನೆ. ಶೀಘ್ರದಲ್ಲೇ ಅದು ರಿಲೀಸ್ ಆಗಲಿದೆ. ಜೊತೆಗೆ ಒಂದು ಶಾರ್ಟ್ ಮೂವೀ ಕೂಡ ಮಾಡಿದ್ದೇನೆ. ಈ ಹಿಂದೆ ಒಂದಷ್ಟು ವಿಡಿಯೋ ಆಲ್ಬಂ ಸಾಂಗ್‌ಗಳಲ್ಲೂ ಕಾಣಿಸಿಕೊಂಡಿದ್ದೇನೆ. ನನ್ನ ಕರಿಯರ್‌ಗೆ ದೊಡ್ಡ ಸಿನಿಮಾ ಅವಕಾಶ ಸಿಕ್ಕಿರುವುದು ‘ಕ್ಯಾಡ್ಬರೀಸ್‌’ ಸಿನಿಮಾದಲ್ಲಿ ಎಂದೇ ಹೇಳಬಹುದು. ಇದರಲ್ಲಿ ನನ್ನದು ತುಂಬ ಗ್ಲಾಮರಸ್ ಪಾತ್ರ. ರೆಟ್ರೋ ಶೈಲಿಯಲ್ಲಿ ಮೂಡಿಬರುತ್ತಿದೆ. ಅಂದಹಾಗೆ, ಇನ್ನೂ ತುಂಬ ಸಿನಿಮಾ ಅವಕಾಶಗಳು ಬರುತ್ತಿವೆ. ಆದರೆ, ಅದರಲ್ಲಿ ಬಹುತೇಕ ಬೋಲ್ಡ್ ಪಾತ್ರಗಳೇ ಹೆಚ್ಚು. ಆರಂಭದಲ್ಲಿ ಬರೀ ಅಂಥ ಪಾತ್ರಗಳನ್ನು ಮಾಡುವುದು ಬೇಡ ಎಂದುಕೊಂಡಿದ್ದೇನೆ. ಈಗ ಮಾಡಿದರೆ, ಮುಂದೆ ಹೆಚ್ಚೆಚ್ಚು ಅಂಥ ಪಾತ್ರಗಳೇ ಸಿಗುತ್ತವೆ. ಅದಕ್ಕೋಸ್ಕರ ಒಳ್ಳೆಯ ಅವಕಾಶಗಳಿಗಾಗಿ ಕಾಯುತ್ತಿದ್ದೇನೆ’ ಎನ್ನುತ್ತಾರೆ ಸೋನು.

ನಿಮ್ಮ ಸ್ನೇಹಿತರಿಗೂ/ಫೇಸ್ಬುಕ್ ಗ್ರೂಪ್ ಗೆ ಶೇರ್ ಮಾಡಿ...
  •  
  •  
  •  
  •  
  •  
  •  
  •  
  •